PITARUIH BUNDO

PITARUAH BUNDO

Nan sakapa lah di ambiak urang
Nan sapinjik tingga di awak
Walau di balun sabalun kuku
Jikok di kambang saleba alam
Walau sagadang bijo labu
Bumi jo langik ado di dalam

Latiak-latiak tabang ka pinang
Singgah manyasok bungo rayo
Aie satitiak dalam pinang
Sinan bamain ikan rayo

Baburu babi ka batu balang
Mandapek buluh jo rotan
Guru mati kitab hilang
Sasek ka sia di tanyokan

Oi buyuang lakehlah gadang
Kapambangkik batang tarandam
Ka maapuih malu di kaniang
Ka manungnu piutang lamo
Ka panampiak mato padang
Ka panantang matohari
Ka palawan dunie urang
Ka pandiri pusako lamo

Bilo kato lah di tanam di hati
Jalehlah sagalo rahasia alam
Jikok di ayun si tambo lamo
Sabarih indak buliah hialng
Satitiak bapantang lupo

Laka jo dulang dalam lubuak
Pandan baduri malendo jalan
Aka hilang paham tatumbuak
Basarah diri kapado Allah

Kilek camin lah kamuko
Kilek baliuang lah ka kaki
Kilek kato lah kahati
Tau di ombak nan basabuang
Tau di angin nan basiuik
Tau di rantiang nan kamalantiang
Tau di duri nan kamancucuak
Tau di dahan ka maimpok
Tau di batu nan katatruang
Ingek-inget sabalun kanai
Nan di bawah kok maimpik
Gabak di hulu tando ka hujan
Cewang di langik tando kapaneh

Manusia tahan kieh
Binatang tahan palu
Tagisia labiah bak kanai
Tasingguang labiah bak jadi

Diagak mako di agiah
Di baliak mako di balah
Bajalan manuju bateh
Balayie manuju pulau

Kuaik rumah karano sandi
Rusak sandi rumah binaso
Kuaik bangso karano budi
Rusak budi hancualah bangso

Basilek di ujuang lidah
Malangkah di pangka karih
Bamain di ujuang padang
Tahan di kieh kato putuih

Tau di kilek sarato bayang
Tau di gelek kato habih
Tau di hereng gendeang
Saratu kureneh jo bainah

Bapikia palito hati
Nanang saribu aka
Taraso lamak jan di lulua
Tarasi paik jan di ludahkan
Bajalan injek-injek langkah
Bakato piaro lidah
Hiduik jan bak pucuak aru
Maikuik kama derehnyo angin
Iyokan nan di urang
Lalukan nan di awak
Tunjuak luruih kalingkiang bakaik

Adaik mudo manangguang rindu
Adaik tuo manangguang ragam
Kok condong jan kumari rabah
Luruih tantang barih adaik

Budi jan tajua
Paham jan tagadai
Kok kayo, kayo dek budi
Nan mulia, mulia dek baso
Budi nan indak katinjauan
Paham nan indak kamaliangan

Iman nan tak buliah ratak
Kamudi nan tak buliah patah
Padoman nan tak buliah tagelek
Haluan nan tak buliah barubah

Sayang jo anak di lacuik-lacuik
Sayang jo kampuang di patinggakan
Hujan ameh di nagari urang
Hujan batu di nagari awak
Kampuang nan jauah di bantu juo

Mati batungkek budi
Huduik ba karilahan
Di timbang jo aka budi
Di pakai raso jo pareso
Di timbang jo nyao badan

Nak luruih rantangkan tali
Nak tinggi tingkekkan budi
Nak hakuih babasi basi
Nak elok lapangkan hati
Nak mulia tapek-i janji
Nak tangguah paham di kunci
Nak kayo kuaik mancari
Nak tuah batabua budi
Nak namo tinggakan jaso
Nak pandai rajin baraja

Ka hilie jalan ka Padang
Ka mudiak jalan ka ulak-an
Kok musuah indak di hadang
Kok basuo pantang di ilakkan

Kalau indak basuo di jalannyo
Namuah ba pua-pua dagiang
Namuah bakacau-kacau darah
Tando sabana laki-laki