KENGANGAN GAMPO 2009

KENANGAN GAMPO 2007

Assalamualikum pembuka kato ..... Bismillah pambuka kaji
Basusun jari di kapalo ..... rila jo maaf mohon di bari
Rila jo maaf ambo pintak ..... taradok nan tuo jo nan mudo
Antah dari ma tumbuahnyo garah ..... mangko tajadi sarupo iko

Tapi samantang kok baitu ..... cancang tantu balandasan
Kato lai batujuan ..... nan kajadi tujuan kato malah kiniko
Tantangan isak tangih kami di kampuang .....
Iyo di ranah Minangkabau, di dalam luak nan tigo, sampai karantau jo pasisia
Dalam lingkungan Sumatera Barat .....

Padang Panjang jo Tanah Data ..... Luak Agam jo Pariaman
Taruih sampai ka daerah solok ..... dapek musibah kasadonyo
Kok lai bana di daerah lain, sarupo Padang jo Pasisia
Payakumbuah jo daerah lintau ..... lai indak mumuak bana

Tapi nan jaleh mak ..... dek musibah gampo nantun
Lah ramuak hati kami di kampuang ..... kalau indak ka manangih
sabab lah ka jaleh ..... baitu keadaan kami kini ..... Baalah lai kini nanko .....
Bukanlah ceceh karano aka ..... Bukan gaduak karano bodi .....
sorong lompatan dalam nagari ..... Tapi dek tangih indak takagumam mak
Ratok nan indak takasuruakkan ..... Mangko tasabuik juo carito nanko .....
Namun sabalun carito ka di boka ..... maafkan ambo di nan banyak
Kok indak takumpua jo nan baserak ..... indak talaiakan nan di batin
Kok indak tabaco nan tatulih ..... tak cukuik tak jajak tak jalani
Patuik tasabuik tak katokan ..... nan basisuruak kok tabokak
Rilakan kami kasadonyo .....

Dek panjang jalan nan ka di turuik, laweh lauik nan ka di ranangi, kok tacukuik tajajak tajalani, tak sadonyo lubang tacicia, maafkan juo kami dek mamak.

Kito tinggakan Bukik Tinggi dalam lingkungan lua Agam, kito tuju daerah Solok. Sajak dari daerah Sumani sampai kanagari Tanah Garam, lah bailau pakiak jo ratok, baa ka indak ka baitu, dari Sumani ka Tanah Garam, sampai Salayo jo Koto Baru, banyak bangunan nan lah karam mak, baiak nan usang baitu nan baru. Lah data mak, lah data samo jo tanah. Rumah adaik jo musajik, rumah sikola, toko bangunan habih runtuah kasadonyo. Awak bansaik badan lah sakik, ka di cubo bana basalang tenggang, urang susah kasadonyo. Kalau lah tajadi sarupo iko, tak babedo bansaik jo kayo, gagah jo buruak indak balain samo sansaro kasadonyo.

Pitih banyak tak paguno, rumah batingkek tak tapakai, sabab baa dek baitu, sasudah gampo tgl 6 bulan tigo 2007, katiko rumah lah ratak jo runtuah, indak ado nan lalok di rumah, sofa rancak, sipirinbed taba, ndak tapakai lah nyo lai.

Bakumpua lalok dalam tenda mak, baiak jantan atau padusi, anget jo dingin samo di raso, auih lapa samo di tangguang, minantu, mintuo samo sajo mak di tenda lalok bagaluang.

Heh, tapi ado pulo nan manggalak ko mak, bacubo pulo di tanah kawan, pai mandi karumah, ado pulo nan buag aie. Ha ..... ha ..... ha ..... katiko datang gampo susulan, tabang ambua mak, tabang ambua lari kalua sadang badannyo basabun, lari kalua rumah. Indak cebok gai mak, sarawanyo lah lakek, untuang lai indak tabaun jo si bawau. Kadang ado pulo hikmahnyo, sansaro mambao nikmat namonyo ko eh. Kalau lah samo2 sansaro, raso kebersamaan, spaik tolong manolong. Sakik sanang tumbuah sacaro samparono, walau kamakan bareh pambagian, ba lauak super mi basayua pucuak ubi, tapi hati lai samo sanang juo.

Cuma nan ketek2 ko mak, ibo awak mancaliaknyo nan ngengek kalaparan, sakik paruik, sakik kapalo, baitu juo nan tuo2 nan sakik parah babujua lalok dalam tenda, antah lah mak ..... antah lah.

Hilia kureta mamuek rantai, baranti tantang batu taba, Sabanyak ko urang marasai mak, tibo di kami sansaro bana. Baa ka indak dek baitu, sasudah gampo nan pertamo sampai nan ka tigo hari Salasa tu, katiko bangunan nan lah banyak runtuah gampo susulan bakataruihan, Gunuang Talang malatuih pulo, tapaso dunsanak awak nan tingga di sekitar gunuang tu, pai pulo mangungsi mak, pai mangungsi katampaik lain.

Banyak mak, banyak bana parasaian di kampuang kini. Kini baitu malah dulu, di STSI kami bagurau, bagurau dendang nan jo basaluang, babuah atok jo oyak kampuang, kok lai sanang sanak di rantau, janguak lah lai kami ka kampuang, untuang taubek juo hati nan taibo, jan mampaturuikkan ragam dunia, lah baruntuah rumah kayu rumah batu bapaliaro, Dari kampuang kami mamanggia dunsanak, angin rantau tolong lah baok, bujuak lah tangih nan ko.
19 November 2012 pukul 16:28 · Suka
Bunda Wiwiek Sukarsih Soeradi > Dari Solok ka Batu Sangka, basimpang jalan di Ombilin Karambatan kito lalu. Urang rantau pulanglah baa, jan ba cukuikan sajo jo pakirin janguaklah kampuang kito dulu. Bak pituah awak juo : " Ujan ameh di rantau urang, ujan batu di kampuang kito ..... cinto ka kampuang indak barubah ".

Sabalun datang musibah gampo mak, Istano Pagaruyuang dulu tapanggang habih tabaka kasadonyo takadia nan datang dari Allah. Istano kabanggaan budayo kito nan batapek di Pagaruyuang di tanah data luak nan tuo, nan salaruik nan salamo nanko mak, lah balapiah musim balangsuang, alun musibah sagadang nan ko. Mandanga Istano habih tabaka, urang Minang lah kalang kabuik, antah lah mak ..... antah ka baa ..... lah kaku lidah ka manyabuik.

Sabab baa dek baitu ..... lah baruntun musibah datang, sambuang basambuang cobaan tibo, isak tangih alun lai tanang mak, gaung ratok lah tibo pulo. Kok daerah Tanah Data ka kito sabuik, sabana parah keadaannyo. ampek baleh kacamatan di Tanah Data, sapuluah kacamatan dapek musibah, kacamatan Pariyangan jo Rambatan, Sapuluah Koto jo Batipuah, itu daerah nan paliang parah. Talabiah bana di Gunuang Rajo, taruih sampai ka Guguak Nyariang, baitu pulo Sumpu Malalo.

Damam lamo alun lai sanang kini datang panyakik baru. Banyak bangunan nan lah runtuah, Musajik jo rumah sikola, Surau Musholla baitu juo, antah lah mak ..... antah ka baa kok malang bana nasib nan ko. Kok nyampang sanak tibo di kampuang, lah jaleh tacangang mancaliaknyo, sabab lah baa dek baitu, lah barubah kasadonyo mak ..... lah barubah ..... lah lain rupo nan di liek, babedo bunyi nan tadanga ..... dulu tingga di rumah batingkek mak, kini lah bagaluang dalam tenda.

" Jawi hitam balang katiak tapauik maruntun tali ulah di rayu jaguang mudo, hari ujan tanah babiak bumi tawa padi manjadi, di sinan rkyat mango santoso ".

Namun indak baitu caritonyo doh mak ..... lah sagalo rumik, lah sagalo susah ..... labiah2 nan di kami nan basalimuik tigo heto, kuli tani jo pagawai randah. Kok di tiliak ka kuli tani, baansua2 mambuek rumah, bakumpuakan pitih saketek2, manabuang sakali samusim, tabali sasak semen, taansuai basi jo bata ..... bataun kami bakulimek, kok lai ka dapek rumah ketek. Lah sulah kapalo manjunjuang kasiak, lah malaleh kuduak mamikua tunggak, sanang hati indak tabado mak, katiko rumah alah tagak. Baitu juo pegawai randah, bapotong gaji bulan ka bulan, ba karidik mambuek rumah, alun karidik lah salasai mak, nan rumah lah runtuah pulo. Ka di cubo mambuek rumah baru, ndak ka mungkin takah agaknyo, SK tagadai kasadonyo, tapaso caro lamo di ulang baliak ..... caro lamo di ulang baliak ..... mangontrak rumah malah tu kini, tingga di lantai labiah urang.

Tapi samantang kok baitu, bak pituah urang awak juo : " Duduak surang basampik2, duduak basamo balapang2 ", lai taraso tu dek di kami ..... taraso bana, katiko kami sadang susah, banyak urang manaruih ibo, baitu juo pemerintah.

Manyingsiang langan kasadonyo, kami manangih baliau sabak mak, lai mangalia datang bantuan. Namun jarak bakajauahan, talambek bantuan di pajalan, badan lah kuyuik payuang tibo, ubek datang, panyakik lah parah, antah pabilo ka sihatnyo.

Maminta kami kapado Bapak, kapado Allah kami mamohon, kok buliah pinto jo pintak, capek sajo turun bantuan. Tapi samantangpun baitu, kok sakik kami lai baubek, damam alah bapaktawa, batarimo kasih kami kapado Bapak, pimpinan kami kasadonyo.

Baa sakarang kini nanko, indak kama lai mangadu mak, lain kumbali kapado kalam Allah : " Walanabluannakum bissai'in minal haufi wal jua' wanaksin minal amwali wal anfusi wasamarat wabashiri shabirin ". " Dan sungguh kami berikan cobaan kpdmu dg sedikit ketakutan, kelaparan, kekurangan harta, jiwa & buah2an & berikanlah berita kepada orang2 yg sabar ".

Bapak2 , sanak sudaro di mano sajo barado .....

Dek lah panjang jalan nan di turuik, lah banyak pulau talampaui, baa sekarang kini nan ko pihak di badan diri kami.

Bak ibaraik si buruang pipik komah ku, tabang malayok di udaro, babunta2 nan jo awan nan babentan2 nan jo asok, puweh malayang nyo malayok, puweh maninggi nyo marandah, tabang ka padang ribu2, iyo di ribo nan satumpak.

Sadang mamakan buah rumpuik litak lapeh awuihpun tibo di sasok ambun nan satitiak sajuak nan bukan alang kapalang bak paneh di timpo rinai sajuak anggauta nan ka tujuahnyo.

Baa sakarang kini nanko ..... dek karano mukasuid alah sampai nan di amak alah pacah, mukasuid bana dalam hati nak babaliak ka pinang nan sabatang mancaliak sarang nan batinggakan rila jo maaf kami pinta. Balam barabah si kaladi inggok di bawah si kaduduak lareh bulunyo duo halai, kok salah tolong pelok-i, kok kurang tolonglah tukuak, senteng tolong sanak bilai,

Bapak2 , sanak sudaro di mano sajo barado .....

Dek lah panjang jalan nan di turuik, lah banyak pulau talampaui, baa kini nan ko pihak di badan diri kami.

Bak ibaraik si buruang pipik komah, tabang malayok di udaro, babunta2 nan jo awan nan babentan2 nan jo asok, uweh malayang nyo malayok, uweh maninggi nyo marandah, tabang ka padang ribu2, iyo di ribo nan satumpak.

Sadang mamakan buah rumpuik litak lapeh awuihpun tibo di sasok ambun nan satitiak sajuak nan bukan alang kapalang bak paneh di timpo rinai sajuak anggauta nan ka tujuahnyo.

Baa nanko ..... dek karano mukasuid alah sampai nan di amak alah pacah, mukasuid bana dalam hati nak babaliak ka pinang nan sabatang mancaliak sarang nan batinggakan rila jo maaf kami pinta. Balam barabah si kaladi inggok di bawah si kaduduak lareh bulunyo duo halai, kok salah tolong pelok-i, kok kurang tolonglah tukuak, senteng tolong sanak bilai,

Wassalamualaikum Wr Wb .....